У расійскім Стаўрапалі ў выніку выбуху гранаты загінулі два мужчыны. Адзін з іх — першы намеснік кіраўніка Стаўрапаля Заур Гурцыеў. Гурцыеў кіраваў паветранай часткай баёў за Марыупаль, падчас якіх загінулі тысячы мірных жыхароў.
Як піша «Агентство» са спасылкай на расійскія тэлеграм-каналы, загінулыя перад выбухам сядзелі на лаўцы ля дома і распівалі алкагольныя напоі. Гранату падарваў невядомы.
«На месцы здарэння працуюць праваахоўныя органы, спецслужбы. Ідуць следчыя дзеянні. Разглядаюцца ўсе версіі, у тым ліку арганізацыя тэракту з удзелам нацыстаў з Украіны», — паведаміў кіраўнік Стаўрапальскага краю Уладзімір Уладзіміраў.
Гурцыеў быў удзельнікам кадравай праграмы «Час герояў» (створаная на прапанову Пуціна для падтрымкі «ўдзельнікаў СВА» і фармавання «сапраўднай эліты» Расіі. — Заўв. рэд.). На яе сайце гаворыцца, што Гурцыеў кіраваў паветранай часткай «аперацыі па вызваленні Марыупаля» і «ўкараніў свае напрацоўкі ў тэхналогію навядзення ракет на цэль, што дазволіла ў разы павялічыць іх дакладнасць і эфектыўнасць, у тым ліку пабіць базу забяспечання „Азова“». Таксама там апублікаваны некралог.
Атака на Марыупаль пачалася 24 лютага 2022 года. 2 сакавіка расійскія войскі ўзялі горад у кальцо. Яго аблога доўжылася тры месяцы. У выніку баёў у Марыупалі было разбурана 90% крытычнай інфраструктуры, знішчана 55% бальніц і 40% школ, больш за 80% шматкватэрных і дзве траціны прыватных дамоў. Колькасць загінулых мірных грамадзян вылічаецца тысячамі.
