Оксфардскі слоўнік назваў галоўнае слова 2022 года. Калі вы пазналі ў ім сябе, варта насцярожыцца

5 снежня 2022 у 1670229180
«Зеркало»

Оксфардскі слоўнік англійскай мовы назваў словам 2022 года слэнгавы выраз goblin mode («рэжым гобліна») - ён азначае малапрыемныя паводзіны чалавека, які заграз у «каранцінным» стане і не хоча вяртацца да нармальнага жыцця. Слова ўпершыню выбралі на грамадскім галасаванні, яно стала самым папулярным сярод 300 тысяч чалавек, гаворыцца на сайце слоўніка.

«Рэжым гобліна» - жаргонны выраз, які можна расшыфраваць як «тып паводзінаў, які характарызуецца бессаромнай паблажлівасцю да сабе, лянотай, неахайнасцю і прагнасцю». «Чалавеку-гобліну» таксама ўласцівая «адмова ад сацыяльных нормаў або чаканняў», тлумачаць аўтары Оксфардскага слоўніка.

Гэтае словазлучэнне ўпершыню было ўжытае ў Твітары яшчэ ў 2009 годзе, аднак вірусным стала толькі ў лютым 2022-га, калі ў большасці краін свету былі знятыя каранавірусныя абмежаванні і людзі пачалі часцей выходзіць з дому.

«Відаць, гэты тэрмін злавіў пераважны настрой людзей, якія адкінулі ідэю вяртання да "нармальнага жыцця" або паўсталі супраць недасяжных эстэтычных стандартаў і ладу жыцця, якія дэманструюцца ў сацыяльных сетках», - разважаюць аўтары.

Каб растлумачыць на прыкладзе, як паводзяць сябе людзі ў «рэжыме гобліна», Оксфардскі слоўнік цытуе газету The Guardian: «Гэта калі вы прачынаецеся, а 2-й гадзіне ночы і брыдзяце на кухню ў адной доўгай футболцы, каб прыгатаваць сабе дзіўны перакус: напрыклад, плаўлены сыр на салёным хлебе».

Другім па папулярнасці словам стала «метасусвет», якое тлумачыцца як «гіпатэтычнае асяроддзе віртуальнай рэальнасці, дзе карыстальнікі ўзаемадзейнічаюць з аватарамі адно аднаго, што часам пазіцыянуецца як патэнцыйнае пашырэнне або замена інтэрнэту».

Трэцім абраным выразам назвалі хэштэг #IStandWith, які азначае «я падтрымліваю». Напрыклад, ён часта выкарыстоўваецца для выказвання падтрымкі Украіне ў вайне з Расіяй: #IStandWithUkraine

Летась Оксфардскі слоўнік абвясціў словам года vax, што азначае «вакцына» або «вакцынацыя».

Нагадаем, раней галоўныя лексемы гэтага года назвалі і іншыя выдавецтвы. Паводле версіі аўтараў амерыканскага тлумачальнага слоўніка Уэбстэра, гэта паняцце «газлайтынг» - яно азначае псіхалагічныя маніпуляцыі, закліканыя прымусіць чалавека сумнявацца ў сваім успрыманні рэальнасці.

А брытанскае выдавецтва Harper Collins, якое выпускае тлумачальны слоўнік англійскай мовы, прапанавала слова permacrisis («пастаянны крызіс») - вытворны тэрмін ад англійскіх словаў permanent (пастаянны) і crisis (крызіс), які азначае «працяглы перыяд нестабільнасці і няўстойлівага становішча».