Беларускі гурт «Дразды» ў 2025 годзе правядзе некалькі развітальных канцэртаў пасля 20 гадоў выступаў. Пра гэта абвясціў у Instagram фронтмен Віталь Карпанаў.
«„Драздам“ — 20 гадоў. Сёлета мы дамо некалькі развітальных шоу. Дзякуй усім, хто быў з намі!» — напісаў музыка.
Першы канцэрт у гонар юбілею гурта пройдзе 12 ліпеня ў Маладзечне — прычым у анонсе не гаворыцца, што ён развітальны.
«Музычны гурт, створаны Віталём Карпанавым у 2005 годзе, за гэты час заваявала сэрцы многіх слухачоў. У рэпертуары — разнажанравыя творы як на беларускай, так і на рускай мовах. Характэрна, што ёсць кампазіцыі, якія адлюстроўваюць родную культуру і традыцыі. А песня „Хата бацькоў“ для многіх стала сапраўдным гімнам малой радзімы — на YouTube яна набрала больш за 4 мільёны праглядаў», — гаворыцца ў апісанні.
Нагадаем, раней на калектыў раззлаваліся беларускія прапагандысты.
Яшчэ ў канцы 2020 года «Дразды» выпусцілі песню «Зіма, зіма, каляды». Праз тры гады старшыня моладзевага парламента пры Нацыянальным сходзе Мікіта Рачылоўскі знайшоў у тэксце навагодняй кампазіцыі «пасхалку». На яго думку, словы «Сыходзь хутчэй, стары» музыкі адрасавалі не старому году, а асабіста Аляксандру Лукашэнку.
Таксама Рачылоўскі заявіў, што лідар гурта Віталь Карпанаў у 2020 годзе «решил оказать содействие, чтобы режим наш государственный упал», а потым «понял, что протесты сходят на нет, взял переобулся и сегодня делает вид, что он патриот, бегает с беларусским флагом». Прапагандыст патрабаваў забараніць калектыў.
Увагу на «Драздоў» ён звярнуў пасля таго, як на гурт і яго фронтмена Віталя Карпанава ўзлавалася гродзенская актывістка Вольга Бондарава. Музыку яна назвала «змагаром-госпереворотчиком». Пры гэтым сам Карпанаў рэгулярна спявае на праўладных канцэртах, а ў адным з выступаў заявіў, што дзякуючы Лукашэнку «мы маем краіну, дзе кожны мае магчымасць шчасліва працаваць, зарабляць, выхоўваць дзяцей і ўнукаў».
