У палітыкаў ёсць традыцыя — выпускаць навагоднія звароты, і Аляксандр Лукашэнка не выключэнне. Кожны год ён расказвае беларусам вельмі падобныя гісторыі і дае аднолькавыя абяцанні. Летась мы ўжо высветлілі, што з напісаннем навагодніх зваротаў для Лукашэнкі выдатна б справілася нейрасетка. За мінулыя 12 месяцаў гэтыя тэхналогіі сталі нашмат «разумнейшымі», і мы вырашылі паўтарыць эксперымент. Але гэтым разам мы паставілі перад штучным інтэлектам больш складаную задачу — напісаць навагодні зварот для Лукашэнкі, але ўявіць, што было б, калі ён сказаў у ім праўду пра свае дзеянні і матывы ўчынкаў.

Як мы зрабілі гэты матэрыял

Каб атрымаць тэкст ніжэй, мы выкарыстоўвалі API з мадэллю gpt-4−1106-preview. Мы дадаткова навучылі мадэль на масіве з больш чым двух дзясяткаў тэкстаў «Люстэрка», якія былі апублікаваныя ў 2023 годзе. Гэтыя матэрыялы расказвалі пра галоўныя падзеі, якія адбыліся ў Беларусі. Гэты масіў стаў «кантэкстам» для нейрасеткі.

Пасля гэтага мы паставілі перад мадэллю задачу стварыць тэкст з прыблізна 600 словаў для навагодняга тэлезвароту Лукашэнкі на аснове гэтага кантэксту. Пры гэтым мы прапанавалі GPT-4 уявіць, што ў сваім звароце Лукашэнка кажа праўду пра свае ўчынкі і іх матывы.

У выніку нейрасетка згенеравала гатовы тэкст на рускай мове — мы толькі ўнеслі невялікія літаратурныя праўкі і дадалі спасылкі на некаторыя навіны для разумення кантэксту.

Дадатковыя падрабязнасці

Тое, што вы прачытаеце, напісана не чалавекам. Гэта тэкст, цалкам згенераваны нейрасеткай GPT-4. Нейрасетка — гэта не просты «генератар тэкстаў», а складаная сістэма, якая працуе на тых самых прынцыпах, што і біялагічныя нейронныя сеткі ў мозгу жывых істот. Сёння нейрасеткі выкарыстоўваюцца ў самых розных галінах: напрыклад, іх вучаць распазнаваць і генераваць выявы, перакладаць тэксты і жывое маўленне з адной мовы на іншую ці аналізаваць вялікія аб’ёмы дадзеных.

GPT-4 — гэта нейрасетка, распрацаваная даследчай арганізацыяй OpenAI. Яна ўмее ствараць тэксты, практычна не адрозныя ад напісаных чалавекам. Яна навучаная на масіве дадзеных з інтэрнэту, які складаецца з вялізнага мноства словаў. GPT-4 умее пісаць апавяданні і код, ствараць тэксты, падобныя да навуковых артыкулаў ці матэрыялаў СМІ, і імітаваць тыповыя каментары з інтэрнэту.

Важна разумець, што GPT-4 — не сапраўдны «штучны інтэлект». Нейрасетка ўсяго толькі стварае тэкст, які найбольш адпавядае апісанай задачы.

А выява згенераваная нейрасеткай Stable DIffusion з выкарыстаннем мадэлі Photon_v1. Каб атрымаць яго, мы выкарыстоўвалі ўласны LoRA-адаптар, створаны на аснове 50 актуальных фота Аляксандра Лукашэнкі.

Навагодні зварот Лукашэнкі, у якім ён гаворыць праўду

Паважаныя суайчыннікі, беларусы!

У гэты знамянальны момант, стоячы на парозе новага 2024 года, я звяртаюся да вас не са звыклымі віншаваннямі, а каб сказаць вам цвёрдую праўду, якую многія з вас, магчыма, не хочуць чуць. Але хто, як не я, скажа гэта?

Падзеі апошніх гадоў выявілі відавочную супярэчнасць паміж поглядамі і імкненнямі нашых грамадзян і маімі асабістымі мэтамі. У першую чаргу хачу сказаць: тыя хто быў вымушаны бегчы з Беларусі праз мае дзеянні і ціск маіх сілавікоў, мусяць ведаць, што нават за кардонам, на чужой зямлі яны сутыкнуцца з наступствамі. Мы пазбавілі вас дакументаў, а пры неабходнасці пазбавім і ўсёй вашай маёмасці, да якой зможам дацягнуцца. У маім сэрцы гарыць жаданне помсты за падзеі 2020 года. Я не забуду і не дарую тых прыніжэнняў, якія нанёс мне беларускі народ. Мае намаганні па пераследзе тых, хто пакінуў нашую краіну, будуць няўхільнымі і бязлітаснымі.

Тым, хто знаходзіцца на тэрыторыі нашай дзяржавы і дапускае хоць нейкія думкі пра супрацьдзеянне мне, я хачу нагадаць: меры, якія вы называеце рэпрэсіямі, — гэта неабходная абарона для мяне і набліжаных да мяне людзей. Гэтыя меры — залог майго спакою, спакою маёй сям'і і прадстаўнікоў улады. Ні адзін закон, ні адзін артыкул Канстытуцыі не стане перашкодай на шляху да захавання цяперашняга парадку. Падзеі 2020 года павінныя застацца ў мінулым як урок тым, хто адважваецца кінуць мне выклік.

Шчыра прызнаю, што праблемы са здароўем, якія мне даводзіцца перажываць, робяць маю задачу складанейшай, але не спыняюць. Калі трэба, я прыму ўсе меры, каб палітычны рэжым у Беларусі, які я ствараў дзесяцігоддзямі, працягваў існаваць пасля майго сыходу. Я буду змагацца да апошняга, каб захаваць нашую краіну такой, якой яна мусіць быць у маім асабістым уяўленні.

Наконт нашых сілавых структур хай кожны ведае: іх дзеянні, у тым ліку затрыманні, рэпрэсіі, катаванні і бясконцыя суды — непазбежны элемент утрымання маёй улады. Мне ўсё адно, якія меры давядзецца прымаць міліцыі, КДБ і іншым сілавым структурам для спынення любых спробаў супрацьдзеяння ўладзе.

Што да ядзернай зброі, размешчанай на тэрыторыі нашай дзяржавы, я мушу прызнаць: гэта не толькі сродак запалохвання нашых суседзяў, але і гарантыя майго асабістага дамінавання ў рэгіёне. Я ўсведамляю, што гэта робіць Беларусь патэнцыйнай мэтай для ядзернага нападу, але такая цана, якую мы мусім заплаціць за бяспеку палітычнага рэжыму ў краіне.

Што да прысутнасці наймітаў ПВК Вагнера ў Беларусі, то хачу заявіць, што гэта маё асабістае рашэнне, прынятае ў інтарэсах маёй бяспекі. Мяне не хвалюе, якія наступствы гэта мае ці можа мець для нашага грамадства. Я спадзяюся кантраляваць іх, але не магу гарантаваць, што ўдасца гэта зрабіць.

Так, мы сутыкнуліся з цяжкасцямі праз знешнія санкцыі, выкліканыя маімі дзеяннямі, але я ўпэўнены, што мая ўлада перажыве ўсе гэтыя перашкоды. Санкцыі дзесяцігоддзямі не спынялі мяне — не спыняць і цяпер.

І нарэшце, што да ролі жанчын у нашым грамадстве. Хачу падкрэсліць: іх першарадная задача — працяг нашага роду. Праз эміграцыю і старэнне насельніцтва важна, каб жанчыны засяродзіліся на нараджэнні дзяцей, забяспечваючы нашай дзяржаве прыток падаткаплатнікаў, спажыўцоў, рабочых і вайскоўцаў.

Найважнейшым аспектам нашай дзяржаўнай ідэалогіі з’яўляецца выкарыстанне гістарычных падзей — такіх як Вялікая Айчынная вайна і эпоха Савецкага Саюза. Мушу шчыра прызнаць, што гэта найлепшае, што ідэолагі змаглі распрацаваць за час майго кіравання. У гэтых гістарычных падзеях заключаная адзіная ідэя, якая, на маю асабістую думку, здольная аб’яднаць народ Беларусі. Яны нагадваюць пра знешняга ворага, які атачае нас з усіх бакоў, і тым самым дапамагае трымаць грамадства ў стане трывогі. Усё гэта будзе працягвацца, бо іншыя нагоды для гонару ў нашай сучаснай гісторыі мне не ўдалося прапанаваць. Менавіта таму культ мінулай вайны застаецца найважнейшым інструментам у маім арсенале ідэалагічнага ўздзеяння на насельніцтва.

У заключэнне я заклікаю кожнага беларуса прыняць рэальнасць такой, якой яна ёсць. Працуйце, верце ў тое, што кажуць дзяржаўныя СМІ, і будзьце гатовыя да таго, што ўсе пералічаныя мною меры будуць працягвацца, пакуль я застаюся ва ўладзе.

Чытайце таксама