Дэпутат Гродзенскага абласнога савета дэпутатаў і кіраўнік ААТ «Прынёманскі» 62-гадовы Іван Ярмац памёр крыху больш за месяц таму — 25 красавіка. Пра гэта ў некралогу, размешчаным у папяровай версіі выдання, напісала навагрудская раённая газета «Новае жыццё» (менавіта гэты рэгіён прадстаўляў у абласным цэнтры чыноўнік). Аднак прычыны смерці ў матэрыяле агучаныя не былі. Як стала вядома «Люстэрку» ад уласнай крыніцы, дэпутат здзейсніў самагубства — гэтую інфармацыю нам потым пацвердзілі мясцовыя ўлады.
— Даведаліся пра гэта тыдзень таму, — расказаў наш суразмоўца. — Усе ў шоку, што Іван Мікалаевіч скончыў жыццё самагубствам. Такі быў пазітыўны чалавек, аптыміст.
Пацвердзілі гэтую інфармацыю і ў Гродзенскім абласным савеце дэпутатаў. Туды журналістка «Люстэрка» патэлефанавала як занепакоеная грамадзянка, каб даведацца, хто будзе замест яго.
— Пакуль гэтае пытанне будзе закрывацца Навагрудскім раённым саветам дэпутатаў. Трэба будзе запісвацца да старшыні, яна будзе закрываць пытанні замест яго, — адзначылі ў савеце.
— Ці праўда, што ён нібыта скончыў жыццё самагубствам? Гэта сапраўды так?
— Ёсць такое.
— А не ведаеце прычыны?
— Не ведаем. Самі ў шоку, шчыра кажучы, бо гэта было абсалютна нечакана. Не ведаем, як там усё насамрэч было, але, на жаль, гэта праўда.
Дэпутатам Іван Ярмац стаў у 2023 годзе ад Шчорсаўскай выбарчай акругі № 44, у якую ўваходзіць сем сельсаветаў Навагрудскага раёна і яшчэ два сельсаветы Лідскага раёна. Яго вылучалі ад калектыву сельскагаспадарчай арганізацыі, якой ён кіраваў, сам мужчына — беспартыйны. «Канкурэнткай» была начальніца аддзела ідэалогіі Навагрудскага райвыканкама, жанчыну вылучалі ад «Белай Русі».
Сам дэпутат — ураджэнец вёскі Бездзеж Драгічынскага раёна Брэсцкай вобласці. Па спецыяльнасці ён аграном, вучыўся ў Беларускай сельскагаспадарчай акадэміі, а да гэтага — у Навагрудскім сельскагаспадарчым тэхнікуме. З 1985 года ён працаваў у аграрнай сферы Навагрудчыны: узначальваў калгас «Вераскова», потым стаў намеснікам старшыні СВК «Прынёманскі».
З 2007 да 2020 года быў старшынёй Любчанскага сельвыканкама Навагрудскага раёна.
А з 13 жніўня 2020-га стаў дырэктарам усё таго ж СВК «Прынёманскі», што ў пасёлку Любча. Прадпрыемства даволі буйное: мяркуючы са звестак сэрвісу kartoteka.by, станам на 2025 год у ім працавала 620 чалавек.
У Беларусі дзейнічаюць цэнтры экстраннай псіхалагічнай дапамогі. Калі вы трапілі ў крызісную сітуацыю, калі ласка, звярніцеся па наступных нумарах:
- Рэспубліканская «Дзіцячая тэлефонная лінія» 8801−100−1611 (кругласутачна);
- Тэлефон даверу РНПЦ псіхічнага здароўя +375 17 272−21−67 (панядзелак-пятніца — з 9.00 да 15.00);
- Брэсцкая вобласць +375 162 51 10 13 (кругласутачна);
- Віцебская вобласць +375 212 61-60-60 (кругласутачна);
- Гомельская вобласць +375 232 31-51-61 (кругласутачна);
- Гродзенская вобласць +375 152 39-83-31 або +375 152 39-83-28 (кругласутачна);
- Мінск, для дарослых: +375 17 352−44−44 або +375 17 304−43−70 (кругласутачна), для дзяцей і падлеткаў: +375 17 263−03−03 (кругласутачна);
- Мінская вобласць +375 17 270−24−01 або +375 29 899−04−01 (кругласутачна);
- Магілёўская вобласць +375 222 71-11-61 (кругласутачна).
