Расследуецца крымінальная справа ў дачыненні да Паўла Лібера і ўдзельнікаў інтэрактыўнай платформы «Новая Беларусь», паведамілі ў Следчым камітэце. Там заявілі, што выявілі больш за 1000 карыстальнікаў платформы.
Як паведамілі ў СК, «расследуецца крымінальная справа ў дачыненні да ўдзельнікаў і кіраўніка экстрэмісцкага фарміравання Паўла Лібера, аб’яднаных інтэрактыўнай платформай „Новая Беларусь“».
З пачатку гэтага года мабільная праграма «Новая Беларусь» называецца SVAE.
«Супрацьпраўная дзейнасць удзельнікаў фарміравання, у тым ліку актыўных карыстальнікаў, якія знаходзяцца на тэрыторыі Рэспублікі Беларусь, была спыненая праваахоўнымі органамі», — заявілі ў СК.
Там дадалі, што ў ведамства ёсць інфармацыя пра «структуру экстрэмісцкага фарміравання, яго ўдзельнікаў, кіраўнікоў, мэты і матывы функцыянавання».
«Ёсць дакладная інфармацыя ў дачыненні да больш чым 1000 карыстальнікаў, якія прайшлі рэгістрацыю ў праграме „Новая Беларусь“ і ўключаных у яе склад іншых сэрвісаў, — расказалі ў СК. — У рамках расследавання крымінальнай справы ўдзельнікам экстрэмісцкага фарміравання, у залежнасці ад ступені ўдзелу ў здзяйсненні злачынства, выстаўленыя абвінавачанні, асобныя — заключаныя пад варту».
Нагадаем, 19 траўня блогер Сяргей Пятрухін апублікаваў на сваім YouTube-канале відэа ад нейкага Аляксея Бурбіцкага, які прадставіўся былым супрацоўнікам праекта «Новая Беларусь». Ён заявіў, што праграму нібыта ўзламалі, а звесткі карыстальнікаў выцеклі ў сеціва. Між тым Павел Лібер у каментары «Люстэрку» заявіў, што гэты малады чалавек з імі не працаваў.
А 23 траўня ў рэдакцыю «Люстэрка» пачалі прыходзіць паведамленні пра нібыта ператрусы, звязаныя з праграмай «Новая Беларусь». Людзі, якія прадстаўляліся відавочцамі, расказвалі, што да іх знаёмых прыйшлі сілавікі, праверылі тэлефоны і знайшлі ў іх праграму, якую стварыў Павел Лібер, пасля чаго іх затрымалі. Але гэтыя гісторыі выглядалі падазрона і выклікалі шмат пытанняў.