Аляксандр Лукашэнка пракаментаваў сваю доўгую адсутнасць на публіцы. Ён паведаміў, што ў яго была адэнавірусная інфекцыя.
«Калі нехта думае, што я паміраць сабраўся, супакойцеся. Супакойцеся. Гэта не больш чым пустыя развагі ў мэсэнджарах і тэлеграм-каналах. Адэнавірус ці што там было? Адэнавірус», — расказаў Лукашэнка.
Паводле ягоных словаў, прайсці лячэнне ў яго не атрымлівалася праз напружаны графік, а так інфекцыя «лечыцца тры дні».
«Але паколькі ў мяне не было магчымасці лячыцца, то ў Маскву, то ў Ленінград, то суботнікі, то ў Гродна папёр ты мяне на плошчу абдымацца з гэтымі дзяўчатамі, то ў Гомель да Крупко — усё гэта назбіралася», — сказаў ён, звяртаючыся да губернатара Гродзенскай вобласці Уладзіміра Караніка.
«Таму паміраць я не збіраюся, хлопцы і дзяўчаты. Вы яшчэ будзеце мучыцца са мной вельмі доўга», — падсумаваў ён.
Адэнавірусная інфекцыя — група інфекцыйных захворванняў чалавека, узбуджальнікам якіх з’яўляюцца адэнавірусы. Яны адносяцца да групы вострых рэспіраторных вірусных інфекцый (ВРВІ) і характарызуюцца паражэннем слізістых абалонак верхніх дыхальных шляхоў, кан’юнктываў, лімфоіднай тканкі.
Нагадаем, пасля таго як 9 траўня стала заўважна, што Аляксандр Лукашэнка мае праблемы са здароўем, больш чым пяць дзён ягонае атачэнне старанна хавала стан палітыка, сам ён на публіцы не паказваўся, што нарадзіла мноства пытанняў. На шосты дзень, 15 траўня, Лукашэнку ўсё ж паказалі — з відавочнымі прыкметамі ўсё яшчэ не вырашаных праблем са здароўем.
Дэпутат расійскай Дзярждумы заявіў, што Лукашэнка хварэе, але не сказаў на што. Прадстаўнік Аб’яднанага пераходнага кабінета па транзіце ўлады Павел Латушка паведаміў, што, паводле інфармацыі НАУ, у палітыка інфекцыйна-алергічны міякардыт.
