Грамадзяніна Польшчы Роберта Тампалу асудзілі ў Беларусі па двух «палітычных» артыкулах. Яго імя 14 ліпеня ўключылі ў «спіс экстрэмістаў» МУС.
Роберт Тампала (па-польску — Robert Tąpała), 19 красавіка 1969 года нараджэння, як адзначаецца ў спісе, асуджаны па ч.1 арт. 368 КК пра абразу Лукашэнкі і арт. 369 КК пра абразу прадстаўніка ўлады. Часцей за ўсё ў выпадку такіх артыкулаў гаворка ідзе пра каментары ў інтэрнэце.
Грамадзяніна Польшчы судзілі ў судзе Цэнтральнага раёна Мінска. Працэс пачаўся 23 чэрвеня. Прысуд Роберту Тампалу вынесла суддзя Анжэла Касцюкевіч.
Якое пакаранне прызначылі 54-гадоваму паляку, невядома. Ён мог атрымаць ад штрафу або папраўчых работ да чатырох гадоў абмежавання ці пазбаўлення волі.
Мяркуючы па тым, што прысуд ужо ўступіў у сілу, мужчына нават не падаваў апеляцыі. Як адзначаецца ў пераліку МУС, ён ужо адбывае пакаранне.
«Люстэрка» знайшло ў сацсетках профіль чалавека па імені Robert Tąpała ў Мінску. На яго старонцы пазначана, што ён працуе ў гандлі і быў альбо ёсць мэнэджарам у мінскай кампаніі «ОрионСвит», буйнога дыстрыб’ютара кандытарскіх вырабаў.