Пажылая беларуска паступіла ў бальніцу ў бадзёрым вясёлым стане і была даволі актыўная і таварыская, але з трэцяга дня шпіталізацыі ў яе заўважылі пастаянную дрымотнасць. Дактары забілі трывогу і пачалі дэталёва разбірацца ў сітуацыі, піша «Медицинский вестник».
Выявілася, што раніцай медсястра давала пацыентцы ўвесь спектр належных на суткі лекаў, у ліку якіх былі і снатворныя прэпараты. Гэта і выклікала адпаведныя наступствы.
Пра гэты выпадак і іншыя самыя распаўсюджаныя памылкі расказала Тамара Малінка, доктар — клінічны фармаколаг РКМЦ Кіраўніцтва справамі прэзідэнта Беларусі ў рамках 2-га кангрэса «Інавацыйная кардыялогія».
Паводле яе, няправільны выбар часу сутак для прыёму лекаў можа выклікаць ускладненні. Яна дадала, што падчас прыёму прэпаратаў вельмі важна выконваць інтэрвал.
Напрыклад, у выпадку з антыбіётыкамі ці антыкаагулянтамі прынцыпова важна прымаць прэпараты з інтэрвалам, названым у лісце прызначэння альбо ў інструкцыі ўжывання. Калі лекі доктар прапісвае двойчы ў дзень, то прамежак часу паміж прыёмамі мусіць быць роўны 12 гадзінам.
«Бываюць сітуацыі, калі ў стацыянары ляжыць пацыент з інфекцыйнай паталогіяй і ніяк не папраўляецца. У якасці прычын такога стану падазраюць рэзістэнтную флору і г. д., але пры бліжэйшым разглядзе аказваецца, што антыбіётыкі яму ўводзяцца з невыкананнем інтэрвалу, адпаведна, у арганізме не назапашваецца патрэбная канцэнтрацыя, і лячэнне не дае неабходнага эфекту», — падкрэсліла фармаколаг.
Сярод іншых частых памылак, звязаных з няправільным выкарыстаннем лекавых прэпаратаў, яна назвала няправільную дозу, спосаб увядзення, а таксама тое, што некаторыя медсёстры няправільна ідэнтыфікуюць пацыентаў, напрыклад, не ўдакладняючы імя і прозвішча, або перыядычна блытаюць лекі, якія захоўваюцца ў падобных дызайнам упакоўках.