На Крымскім мосце прагрымеў выбух. Што пра гэта вядома?

На Крымскім мосце ў ноч на панядзелак, 17 ліпеня, быў спынены рух. Паводле словаў кіраўніка акупаванага Крыма Сяргея Аксёнава, там «адбылося надзвычайнае здарэнне ў раёне 145-й апоры». У выніку выбуху загінула сямейная пара расіян, іх дачка-падлетак у бальніцы. У Расіі заявілі пра тэракт з боку Украіны і распачалі крымінальную справу. Пра здарэнне паведамляюць афіцыйныя асобы і тэлеграм-каналы.

Што здарылася

«Адбылося надзвычайнае здарэнне ў раёне 145-й апоры з боку Краснадарскага краю. Працуюць праваахоўныя органы і ўсе адказныя службы», — паведаміў у тэлеграм-канале каля 4 гадзін раніцы 17 ліпеня кіраўнік акупаванага Крыма Сяргей Аксёнаў. Падрабязнасцяў інцыдэнту ён не раскрыў.

Пазней ён заклікаў жыхароў паўвострава і прыезджых устрымацца ад паездак праз мост і выбіраць альтэрнатыўны сухапутны маршрут праз іншыя акупаваныя рэгіёны Украіны.

Як піша Baza, відавочцы паведамілі пра гукі выбуху з Крымскага моста і густы дым, які ўздымаецца над ім. Мясцовыя жыхары таксама дзеляцца начнымі фота моста — на здымках відаць, што асвятленне двух пралётаў адключанае.

Паводле інфармацыі Mash, разбураны пралёт Крымскага моста ў бок Тамані, яшчэ адзін у напрамку Керчы прасеў. Паведамляецца, што каля трох гадзін ночы там пачуўся гук выбуху і згасла святло. Праз некалькі хвілін на мосце перакрылі рух. У 3.20 у раёне чыгуначнага моста адбыўся яшчэ адзін выбух.

У Мінтрансе Расіі паведамілі, што з боку Крыма было пашкоджанае дарожнае палатно на пралётах моста. Аднак запэўнілі, што канструкцыі пралётаў знаходзяцца на сваіх апорах, і абверглі інфармацыю пра пашкоджанне.

Паводле інфармацыі Mash, у раёне атакі ля 145-й апоры знойдзеныя абломкі водных матацыклаў, якія можна мадэрнізаваць у БПЛА з выбухоўкай. Яны ідуць да цэлі практычна пад вадой, вызіраючы на паверхню толькі на некалькі сантыметраў.

У выніку надзвычайнага здарэння быў пашкоджаны аўтамабіль з белгародскімі нумарамі Расіі і загінулі два чалавекі, якія знаходзіліся ў ім. Як паведаміў губернатар Белгародскай вобласці РФ Вячаслаў Гладкоў, гэта муж і жонка з Навааскольскай акругі. Таксама пацярпела іх няпоўнагадовая дачка, расказалі ў оперштабе Краснадарскага краю. Папярэдні дыягназ — закрытая чэрапна-мазгавая траўма, стан сярэдняй ступені цяжкасці. Цяпер яна ў рэанімацыі.

Паводле звестак Baza, пацярпелай дзяўчынцы 14 гадоў, сям’я ехала ў Крым на адпачынак.

Дарадца кіраўніка анексаванага Крыма Алег Кручкоў паведаміў, што аўтобусная камунікацыя паміж паўвостравам і Краснадарскім краем ужо адноўленая, але з перасадкай — частку дарогі пасажырам трэба будзе праехаць на электрычках.

Легкавыя аўтамабілі з паўвострава найбліжэйшым часам пачнуць адпраўляць праз паромную пераправу. Рух грузавога аўтатранспарту будзе ажыццяўляцца толькі праз анексаваныя тэрыторыі, паведамляе ТАСС.

Таксама раніцай адноўлены рух цягнікоў па Крымскім мосце.

Рэакцыя ў Расіі

У крымскай пракуратуры заявілі, што ўзялі «на асаблівы кантроль» ход высвятлення абставінаў здарэння, перадае «Смотри».

Кіраўнік парламента акупаванага Крыма Уладзімір Канстанцінаў абвінаваціў у атацы на мост Украіну і прыгразіў «няўхільнасцю адплаты».

Нацыянальны антытэрарыстычны камітэт РФ заявіў, што на Крымскі мост ажыццявілі тэрарыстычную атаку, паведамляе «Коммерсант».

«Пашкоджаны аўтадарожны складнік», — растлумачылі ў ведамстве.

Там лічаць, што мост атакавалі двума ўкраінскімі беспілотнымі падводнымі апаратамі. Распачатая крымінальная справа пра тэракт.

У Следчым камітэце РФ высвятляюць «асобаў з ліку ўкраінскіх спецслужбаў і ўзброеных фармаванняў, якія маюць дачыненне да арганізацыі тэракту на Крымскім мосце».

У МЗС РФ заявілі, што рашэнне пра атаку прымалася ўладамі Украіны і вайскоўцамі «з ўдзелам амерыканскіх і брытанскіх спецслужбаў».

Рэакцыя ва Украіне

На тое, што здарылася, адрэагавалі ва Украіне. Прадстаўнік Галоўнага ўпраўлення разведкі Андрэй Юсаў у гутарцы з «Суспільне» ад каментароў адмовіўся, працытаваўшы свайго начальніка Кірыла Буданава: «Крымскі мост — канструкцыя там лішняя».

Як паведамілі «РБК-Украіна» крыніцы ў СБУ, начная атака на Крымскі мост была спецаперацыяй ваенна-марскіх сіл УСУ і Службы бяспекі Украіны.

«Мост атакавалі з дапамогай надводных дронаў. Дайсці да моста было складана, але ўрэшце гэта ўдалося зрабіць», — паведаміла крыніца.

У афіцыйным каментары для «РБК-Украіна» прадстаўнік СБУ Арцём Дэхцярэнка паабяцаў, што «дэталі па арганізацыі хлапку» на Крымскім мосце спецслужба раскрые пасля перамогі Украіны.

«Пакуль мы з цікавасцю назіраем, як адзін з сімвалаў пуцінскага рэжыму чарговым разам не вытрымаў ваеннай нагрузкі», — сказаў Дэхцярэнка.

Ён адзначыў, што Крымскі мост сёння — адзін з транспартных калідораў ваенных паставак для расійскай арміі. А таксама падкрэсліў, што нормы міжнароднага права, аналіз аператыўнай абстаноўкі і традыцыі вядзення вайны дазваляюць пераразаць лагістычныя шляхі праціўніка.

Ва УСУ заявілі, што выбухі на Крымскім мосце маглі быць правакацыяй Расіі на фоне заканчэння збожжавай угоды.

«Характэрна тое, што пры такой канцэнтрацыі карабельнай групоўкі ў гэтым раёне і агульнага напружання на фоне пытання па пралангацыі „збожжавай угоды“, стварэнне такіх правакацый, пра якія вельмі гучна адразу рапартуюць акупацыйныя ўлады Крыма, з’яўляецца тыповым спосабам вырашэння пытанняў краіны-агрэсара», — сказала «Суспільнаму» спікер аператыўнага камандавання «Поўдзень» Наталля Гумянюк.

Удар па Крымскім мосце пракаментаваў і спікер Паветраных сіл УСУ Юрый Ігнат.

«Можна толькі парадавацца такой сітуацыі. Вады няма, турыстаў няма, моста няма. І хоць камяні з неба! Гэта добрыя навіны для нас», — цытуе яго УНІАН.

Дэпутат Вярхоўнай рады Украіны Аляксей Ганчарэнка назваў пашкоджанне пралёта Крымскага моста «велізарным поспехам Украіны».

«Усе, хто мае дачыненне да гэтага, мусяць быць прадстаўленыя да найвышэйшых дзяржаўных узнагарод. Удар па мосце — гэта дэманстрацыя для Захаду, што мы гатовыя вярнуць нашыя тэрыторыі», — напісаў ён у тэлеграм-канале.

«Якія-кольвек незаконныя канструкцыі, якія выкарыстоўваюцца для дастаўкі расійскіх інструментаў масавых забойстваў, недаўгавечныя. Незалежна ад прычын разбурэння», — выказаўся ў Twitter дарадца кіраўніка Офіса прэзідэнта Украіны Міхаіл Падаляк.

Нагадаем, у кастрычніку мінулага года на Крымскім мосце падарвалася набітая выбухоўкай фура, якая ехала ў Крым з Краснадара. Тады абрынуўся адзін з пралётаў аўтадарогі, яшчэ два пралёты — часткова. Загінулі чатыры чалавекі.

Расійскі бок абвінаваціў у дыверсіі Украіну, украінскі бок намякнуў, што гэта маглі зрабіць і самі расіяне.

Крымскі мост працягласцю 19 км — самы доўгі ў Еўропе. Рух легкавых аўтамабіляў і аўтобусаў па ім адкрылі 16 траўня 2018 года, праезд грузавікоў — 1 кастрычніка таго ж года. Пасажырскія цягнікі пайшлі па чыгуначнай частцы моста 25 снежня 2019 года. Грузавыя цягнікі запусцілі 30 чэрвеня 2020 года.