«Яшчэ адзін з серыі безадказных каментароў». Дзярждэп ЗША — пра заяву Лукашэнкі пра паход вагнераўцаў на Варшаву і Жэшуў

У ЗША словы Аляксандра Лукашэнкі пра тое, што вагнераўцы просяцца на захад, «на экскурсію ў Варшаву і Жэшуў», лічаць чарговым безадказным каментаром. Амерыканская армія гатовая абараняць кожны сантыметр тэрыторыі NATO, адзначыў на брыфінгу прадстаўнік Дзярждэпартамента ЗША Мэцью Мілер.

«Я скажу, што гэта яшчэ адзін з серыі безадказных каментароў Лукашэнкі. І адзінае, што я паўтару, як казаў з іншай нагоды раней на гэтым брыфінгу, Злучаныя Штаты будуць абараняць кожны дзюйм тэрыторыі NATO», — сказаў Мілер.

Ён таксама пракаментаваў словы прэзідэнта Расіі Уладзіміра Пуціна, што Польшча плануе захапіць Заходнюю Украіну. «Я б сказаў, што ёсць толькі адна краіна ў рэгіёне, якая прадэманстравала не толькі намер, але і гатоўнасць уварвацца да сваіх суседзяў. І гэта Расія, а не Польшча, не якая-кольвек іншая краіна ў рэгіёне. Такім чынам, я хацеў бы проста паўтарыць, што наш саюз з Польшчай моцны. Польшча, вядома, сябра NATO, і мы будзем абараняць, калі спатрэбіцца, кожны сантыметр тэрыторыі NATO», — дадаў Мілер.

Нагадаем, 23 ліпеня Лукашэнка сустракаўся з Пуціным пад Санкт-Пецярбургам. Там ён паведаміў, што яго пачалі «напружваць» вагнераўцы. «Просяцца на захад: „Дазвольце нам!“ Я кажу: „Вам навошта на захад туды?“ Ну і цішком… Мы ж кантралюем, што адбываецца. — „Ну, сходзім на экскурсію ў Варшаву і Жэшуў“», — расказваў палітык.

Раней, 21 ліпеня, Пуцін заявіў на нарадзе з чальцамі Савета бяспекі, што Польшча плануе акупаваць тэрыторыі Украіны, а таксама прыглядаецца да беларускіх земляў.