Гідролагі фіксуюць пад’ём узроўню вады ў рэках па ўсёй Беларусі, асабліва ў Віцебскай вобласці. А ў Заходняй Дзвіне вада наогул разлілася амаль на 10 метраў і пабіла рэкорд 10-гадовай даўніны, паведамілі на СТБ.
Толькі за суткі прырост узроўню вады ў Заходняй Дзвіне склаў 22 сантыметры.
Пад Віцебскам рака ўжо размыла частку прасёлкавай дарогі і ўсё бліжэй падбіраецца да дамоў. У Віцебскім раённым аддзеле па надзвычайных сітуацыях расказалі, што пачалі ўмацоўваць берагавую лінію з дапамогай буйнога будаўнічага смецця і нават паваленых дрэваў. Садоўнікам пакуль рэкамендуюць трымацца далей ад сваіх участкаў.
У Гарадоцкім і Верхнядзвінскім раёнах Віцебскай вобласці вада затапіла жылыя дамы — давялося адсяліць іх жыхароў, якія часова перабраліся да сваякоў, паведамілі ў МНС.
У ведамстве дадалі, што ад паводак таксама асабліва моцна пацярпелі Гомельскі, Мазырскі, Рагачоўскі, Чачэрскі раёны Гомельскай вобласці і Лунінецкі раён Брэсцкай вобласці.
Гідролагі выпусцілі бюлетэнь, згодна з якім вада расце на 1−41 см за суткі на ўсёй даўжыні Дняпра, Бярэзіны і Прыпяці, вялікай частцы Заходняй Дзвіны, Нёмана, Віліі і ў ніжнім цячэнні Сожа. На большасці рэк вада знаходзіцца на пойме.
Узроўні вады перавышаюць небяспечныя высокія адзнакі на Заходняй Дзвіне ля Полацка і Верхнядзвінска, Бярэзіне — ля Барысава і Бабруйска, Сожы — ля Гомеля і на іншых рэках.
Акрамя таго, узроўні вады набліжаюцца да небяспечных высокіх адзнак на Заходняй Дзвіне ля Віцебска, Нёмане — ля Стоўбцаў, Дняпры — ля Магілёва і іншых вадаёмах.
Тым часам у Віцебску разлілася не толькі Заходняя Дзвіна, але і Віцьба — затопленыя пешаходны мост і зона адпачынку ў пойме ракі, спартыўная пляцоўка, зона для гульні ў пляжны футбол і шпацырная дарожка.
