Следчы камітэт распачаў крымінальную справу па факце ДТЗ з аўтобусам Масква — Брэст, які з’ехаў у кювет пад Дзяржынскам у нядзелю, паведамілі ў ведамстве.
Распачатая крымінальная справа ў дачыненні да 49-гадовага кіроўцы аўтобуса па ч. 2 арт. 317 КК (Парушэнне правілаў дарожнага руху, якое пацягнула па неасцярожнасці нанясенне цяжкага цялеснага пашкоджання).
Следства прыйшло да высновы, што кіроўца рэйсавага аўтобуса Масква — Брэст, які ехаў раніцай 18 жніўня па 313-м кіламетры трасы М-1, заснуў за рулём. У выніку транспарт з’ехаў у кювет і ўрэзаўся ў дрэва.
Нагадаем, у салоне былі два кіроўцы і 46 пасажыраў. Усяго пацярпелі дзевяць чалавек, трое шпіталізаваныя, у тым ліку кіроўца.
Адзін з пацярпелых, шпіталізаваны ў Дзяржынскую ЦРБ, знаходзіцца ў аддзяленні анестэзіялогіі і рэанімацыі. Яго стан ацэньваецца як сярэдняй цяжкасці.
Таксама вядома, што сярод шпіталізаваных двое расіян.