Уладальнік вялікай колькасці рэкордаў у Лізе чэмпіёнаў і гульнях за нацыянальную зборную. Пяціразовы ўладальнік «Залатога мяча» (часцей найлепшым футбалістам свету прызнавалі толькі Ліянэля Месі). Ён скарыў планку ў 800 забітых мячоў у афіцыйных матчах. Але ў гэтым сезоне 37-гадовы Крышціяну Раналду мала нагадвае сябе ранейшага — усяго два галы ў 12 матчах за «Манчэстэр Юнайтэд». Значна часцей пра партугальца гавораць з нагоды яго паводзін і напышлівага стаўлення да каманды. Сабралі ўсе апошнія выхадкі аднаго з найлепшых футбалістаў свету і даведаліся ў партугальскай журналісткі, што пра ўсё гэта думаюць у яго на радзіме.
Хроніка піке
Раналду перайшоў у «Манчэстэр Юнайтэд» летам 2021 года з «Ювентуса». У Прэм’ер-лізе партугалец ужо выступаў за «чырвоных д’яблаў» з 2003 па 2009 год. Гэта быў першы клуб Крышціяну за межамі роднай Партугаліі.
Мінулы сезон атрымаўся для футбаліста супярэчлівым. З аднаго боку, форвард паказаў нядрэнную выніковасць, забіўшы 18 мячоў у чэмпіянаце Англіі і шэсць — у Лізе чэмпіёнаў. З іншага — «Манчэстэр Юнайтэд» выступіў кепска. Каманда заняла толькі шостае месца ў Прэм’ер-лізе і вылецела ў 1/8 фіналу ЛЧ. Гэта ўдарыла па амбіцыях Раналду. І панеслася…
Амаль усё лета хадзілі чуткі, што Крышціяну збіраецца змяніць каманду. Яго сваталі ў «Баварыю», «Атлетыка», «Спортынг» і нават Саудаўскую Аравію, але ў выніку форвард застаўся ў Манчэстэры. Хоць прапусціў амаль усю перадсезонку. Спачатку не з’яўляўся ў «Юнайтэд» па сямейных абставінах, а потым проста трэніраваўся самастойна.
31 ліпеня. Раналду ўпершыню згуляў за МЮ у перадсезонцы. Форвард выглядаў непераканаўча ў матчы з «Раё Вальекана» (1:1) і быў заменены ў перапынку. Ён не стаў чакаць заканчэння сустрэчы на лаўцы запасных — прыкладна за дзесяць хвілін да фінальнага свістка фанаты сфатаграфавалі Раналду за межамі арэны.
— Я адназначна не магу прыняць такое. Гэта непрымальна і адносіцца да ўсіх. Мы — каманда, усе павінныя заставацца да самага канца, — пракаментаваў учынак форварда галоўны трэнер каманды Эрык тэн Хаг.
Магчыма, не толькі пропуск мноства заняткаў з камандай, але і той інцыдэнт паўплываў на становішча Крышціяну ў «Юнайтэд». Усё часцей пачалі з’яўляцца чуткі, што паводзіны Раналду расчароўваюць трэнераў і аднаклубнікаў. Партугалец не трапіў у аснову «чырвоных д’яблаў» у першым туры Прэм’ер-лігі. І наогул выходзіў на старт толькі ў двух з васьмі матчаў чэмпіянату, у якіх узяў удзел.
17 жніўня. Паліцыя вынесла папярэджанне Раналду пасля інцыдэнту з заўзятарам «Эвертана». Усё адбылося яшчэ вясной 2022-га, калі партугалец выбіў тэлефон (той разбіўся) з рук 14-гадовага хлопчыка. У падлетка з дыягнаставаным аўтызмам нават застаўся сіняк.
23 жніўня. Гісторыя з разбітым тэлефонам набрала абароты. Мама падлетка Сара Келі падзялілася падрабязнасцямі размовы з Крышціяну. Той нібыта сам патэлефанаваў, каб папрасіць прабачэння. Але гутарка не задалася. Са словаў Келі, «Раналду — самы фанабэрысты чалавек, з якім яна калі-небудзь размаўляла».
— Ён сказаў, што мне не захочацца, каб гэта трапіла ў прэсу і суд. Ён сказаў, што ў яго добрая каманда юрыстаў, ён пераможа і будзе змагацца са мной да канца. Ён сказаў, што ведае, як гуляць з медыя.
23 верасня. У сувязі з тым інцыдэнтам Футбольная асацыяцыя Англіі (FA) абінаваціла Раналду ў парушэнні сваіх правілаў. У заяве сцвярджаецца, што паводзіны форварда пасля фінальнага свістка былі некарэктнымі і/або агрэсіўнымі.
27 верасня. Прафесар псіхалогіі, пісьменнік Джордан Пітэрсан расказаў пра свой візіт да Раналду. Прычына, паводле словаў спецыяліста, заключалася ў нейкіх праблемах, якія ўзніклі ў жыцці футбаліста.
— У асноўным мы абмяркоўвалі, чаго ён хоча ад будучыні, гаварылі пра некаторыя перашкоды, з якімі ён сутыкнуўся на гэтым шляху. Я б сказаў, што ў нас была стратэгічная размова, — заявіў прафесар.
27 верасня. Раналду кінуў на поле капітанскую павязку. Гэта здарылася пасля заканчэння матча зборных Партугаліі і Іспаніі. Каманда Крышціяну саступіла (0:1) і не выйшла ў плэй-оф Лігі нацый. Зрэшты, гэта была не першая такая выхадка форварда.
2 кастрычніка. Стала вядома, што Раналду не будзе на постарах з зоркамі чэмпіянату свету — 2022 у Катары, якія арганізатары размесцяць на хмарачосах у Досе. За Крышціяну заступілася сястра футбаліста Каця Авейру: «Я заўсёды буду з табой, мой кароль. Будзь спакойны».
19 кастрычніка. «Манчэстэр Юнайтэд» абыграў дома «Тотэнхэм» (2:0). Раналду праседзеў матч на лаўцы запасных, а на 90-й хвіліне, яшчэ да завяршэння гульні, пакінуў камандную зону. Прычым гулец сышоў нават не ў распранальню — проста схаваўся за межамі стадыёна, як і падчас перадсезонкі. Натуральна, гэта выклікала шмат крытыкі.
— Футбол — камандны від спорту, вы пастаянна знаходзіцеся разам, гуляеце побач. Таму трэба адпавядаць пэўным стандартам. І я павінен гэта кантраляваць, — сказаў тэн Хаг.
А вось з якой заявай выступіў сам Раналду:
— Як я заўсёды рабіў цягам усёй сваёй кар’еры, я стараюся жыць і гуляць з павагай да сваіх калег, сапернікаў і трэнераў. Гэта не змянілася. Я не змяніўся. Я той самы чалавек і той самы прафесіянал, якім быў апошнія 20 гадоў, гуляючы ў элітны футбол, і павага заўсёды грала вельмі важную ролю ў працэсе прыняцця мной рашэнняў.
Па словах Крышціяну, ён заўсёды стараўся даваць прыклад моладзі, але «гэта не заўсёды магчыма, і часам запал жарсцяў бярэ верх».
Як бы там ні было, форвард быў адхілены ад трэніровак з асновай, аштрафаваны і не трапіў у заяўку на гульню з «Чэлсі» 22 кастрычніка. Каманды згулялі ўнічыю (1:1). Проста цяпер у Прэм’ер-лізе «Манчэстэр Юнайтэд» займае шостае месца (20 ачкоў пасля 11 матчаў). І хоць тэн Хаг заявіў, што Раналду патрэбны камандзе, наўрад ці ён будзе пярэчыць, калі апальны форвард ўсё-такі знойдзе новы клуб.
Погляд з радзімы
А што думаюць пра гульню і паводзіны Раналду ў самой Партугаліі? Падзяліцца сваім меркаваннем «Зеркало» папрасіла журналістку Лідыю Гомес, якая піша пра спорт для аўтарытэтнай газеты Expresso.
— Партугальцы вельмі ўдзячныя Раналду. Думаю, менавіта таму яго нялёгка крытыкаваць. Людзі падзеленыя. Ёсць тыя, хто абараняе Крышціяну, што б ён ні рабіў, але многім ужо трохі надакучыла, што 37-гадовы хлопец так сябе паводзіць. У тых, хто яго крытыкуе, расчараванне ідзе з пачатку гэтага сезона, калі Раналду спрабаваў пакінуць «Юнайтэд», бо хацеў гуляць у Лізе чэмпіёнаў. Партугальцам гэта не вельмі падабалася. Футбаліст быццам уцякаў, хоць ён таксама нясе адказнасць за тое, што «Манчэстэр» не трапіў у ЛЧ. Але калі вы пагледзіце мясцовае тэлебачанне, каментатары да гэтага часу часта абараняюць Крышціяну. Магчыма, праз патрыятызм, бо складана апраўдаць чымсьці, напрыклад, датэрміновы сыход у распранальню. Акрамя таго, партугальцаў турбуе, што Раналду прыедзе на чэмпіянат свету не ў найлепшай форме, без гульнявой практыкі, а трэнер напэўна выставіць яго ў стартавым складзе, нават калі гэта нашкодзіць камандзе.
Лідыя лічыць, што мы больш не ўбачым Крышціяну на тым узроўні, што і раней.
— Яму 37 гадоў, ён ужо немалады гулец. Думаю, Раналду цяпер не падыходзіць для інтэнсіўнай гульні Прэм’ер-лігі. Ён усё яшчэ можа быць выдатным бамбардзірам, але сучасны футбол патрабуе большага. Крышціяну не ўпісваецца ў манеру дзеянняў «Юнайтэд». Ён ніколі не быў прэсінгавальным гульцом, які абараняўся, а менавіта пра гэта просіць тэн Хаг. Аналагічныя патрабаванні і ў найлепшых клубах Еўропы. Я думаю, што Раналду памыліўся, пакінуўшы Італію, дзе тэмп гульні павольнейшы, а ў Крышціяну было не так шмат абарончых абавязкаў. Так што выхад бачыцца ў тым, каб перайсці ў менш моцны чэмпіянат. Там ён зможа рабіць больш тое, што ўмее лепш за ўсё, — ствараць вастрыню каля брамы саперніка.
Журналістка перакананая, што імідж Раналду ў Партугаліі пацярпіць праз апошнія падзеі.
— Людзі дагэтуль захапляюцца гісторыяй яго поспеху. Гэта хлопец, які вырваўся з беднасці і шмат працаваў, каб стаць найлепшым у свеце. Ён вельмі прафесіянальны ў сваёй справе, у падрыхтоўцы да матчаў. Нават цяпер. Але ў яго яшчэ і гіганцкае эга. Калі гэта не шкодзіць астатнім, людзі даруюць Крышціяну ўсё, але сёлета ён ставіць сваю каманду пад пагрозу. Публічна не паважае трэнера, ладзіць істэрыкі. Заўзятары сытыя па горла, бо Раналду больш не паказвае гульні, якая раней дазваляла закрываць вочы на яго дзеянні па-за полем.
Лідзія думае, што спадчына Крышціяну не будзе ставіцца пад сумнеў, але асадак ёсць.
— Мы ведаем, што ён найлепшы партугальскі гулец у гісторыі. Раналду прынёс людзям з нашай краіны вельмі шмат радасных момантаў. За гэта мы заўсёды будзем дзякаваць Крышціяну і захапляцца ім. Але апошнія скандалы — пляма. Больш за ўсё людзі асцерагаюцца, што футбаліст завершыць кар’еру такім чынам.
Чытайце таксама
