У прынцэсы Уэльскай Кэтрын пасля хіміятэрапіі ўзніклі ўскладненні. Пра гэта піша The Sun.
Паводле звестак каралеўскай эксперткі Кэці Нікал, якая піша пра каралеўскую сям’ю для Vanity Fair, у Мідлтан былі праблемы ў пачатку лячэння, бо хіміятэрапію давялося праходзіць у той час, калі яна яшчэ аднаўлялася пасля складанай аперацыі на брушной поласці.
«Спачатку ў яе былі праблемы з лячэннем. Прафілактычная хіміятэрапія — гэта не самая прыемная рэч. Ніхто не хоча праходзіць яе адразу пасля сур’ёзнай аперацыі і даволі доўгага перыяду аднаўлення, былі асцярогі, што яна зноў вымушаная лячыцца», — Кэці Нікал.
Паводле яе звестак, цяпер Кейт Мідлтан праходзіць новы этап лячэння. Прынцэса вернецца да сваіх абавязкаў, калі дактары дазволяць ёй гэта.
Дадамо, што ў пачатку чэрвеня муж прынцэсы прынц Уільям з’явіўся на мерапрыемстве ў памяць герояў вайны. Адзін з гасцей спытаў у яго, ці ідзе на папраўку Кейт Мідлтан.
«Так, яна папраўляецца. Яна б з радасцю была тут сёння», — адказаў тады прынц Уільям.
Нагадаем, у канцы сакавіка Кейт Мідлтан апублікавала відэа, у якім расказала, што ў яе знайшлі рак і яна пачала курс прафілактычнай хіміятэрапіі. Паводле яе, анкалогію выявілі дзякуючы аналізам, якія яна здала пасля аперацыі на брушной поласці, якая адбылася ў студзені.