Шахматыст Магнус Карлсэн, якога раней выключылі з чэмпіянату свету па рапідзе, вырашыў выступіць на ЧС па бліцы. Пра гэта ён сказаў у інтэрв'ю YouTube-каналу Take Take Take.
«Я згуляю як мінімум яшчэ адзін дзень у Нью-Ёрку. Калі ў мяне атрымаецца добра, то потым буду гуляць і ў другі дзень», — заявіў Карлсэн.
Турнір пройдзе 30 і 31 снежня. Паводле гросмайстра, яму падабаецца гуляць бліц.
Нагадаем, раней у Нью-Ёрку разгарэўся скандал з Магнусам, якога ў пятым туры абыграў беларус Дзяніс Лазавік. Карлсэн атрымаў штраф у памеры 200 даляраў за з’яўленне на турніры ў джынсах. Такі стыль адзення забаронены правіламі спаборніцтваў. Пасля штрафу галоўны арбітр запатрабаваў ад Магнуса пераапрануцца, але той адмовіўся. У выніку гросмайстар быў адхілены ад удзелу ў дзявятым туры чэмпіянату свету па рапідзе і выключаны з турніру.
Пасля дыскваліфікацыі шматгадовы лідар рэйтынгу і адзін з найлепшых шахматыстаў усіх часоў Карлсэн заявіў, што не будзе ўдзельнічаць і ў блізкім ЧС па бліцы.
«Няхай настойваюць на сваіх правілах. Мяне гэта задавальняе. Я адказваю: добра, я сыходжу. Ідзіце на **й», — сказаў спартовец.
Але, як бачым, нарвежац перагледзеў сваю пазіцыю. Інтэрв'ю Магнуса з’явілася неўзабаве пасля заявы прэзідэнта Міжнароднай шахматнай федэрацыі (FIDE) Аркадзя Дварковіча з нагоды дрэс-коду:
— Пасля кансультацый з нашымі партнёрамі я прыняў рашэнне апрабаваць падыход, які дасць больш гнуткасці для афіцыйных асобаў FIDE падчас вынясення рашэнняў пра адпаведнасць адзення патрабаванням. Калі ўзнікнуць якія-небудзь сумневы, будуць прыцягвацца спецыяльныя памочнікі для прыняцця канчатковых рашэнняў. Прынцып просты: па-ранейшаму патрабуецца прытрымлівацца афіцыйнага дрэс-коду, але дапускаюцца невялікія элегантныя адхіленні (у прыватнасці, прыдатныя джынсы у тон да пінжака).
«Гэта пытанне прынцыпаў — я выйду гуляць у джынсах», — дадаў Карлсэн у тым жа інтэрв'ю.