Самае буйное незаконнае грашовае ўзнагароджанне, зафіксаванае ў матэрыялах крымінальных справаў у 2022 годзе, склала адзін мільён даляраў, паведаміў начальнік упраўлення па барацьбе з карупцыяй і арганізаванай злачыннасцю Генеральнай пракуратуры Ігар Грэйба на прэс-канферэнцыі ў Доме прэсы 8 снежня.
Спікер не расказаў, хто перадаваў такі хабар і каму ён прызначаўся.
— Максімальны хабар сёлета зафіксаваны ў памеры 1 млн даляраў. Я памятаю гадоў 5−7 таму фігураваў хабар звыш 1 млн рублёў, але ён не быў атрыманы, бо праваахоўныя органы на стадыі атрымання паспелі спыніць, — сказаў ён.
Сёлета колькасць выяўленых карупцыйных злачынстваў у Беларусі павялічылася на 35% у параўнанні з мінулым годам. Аднак, паводле словаў Грэйбы, гэта сведчыць не пра хвалю карупцыі, а пра павышэнне эфектыўнасці выяўлення такіх злачынстваў.
— Матэрыяльная шкода ад карупцыйных злачынстваў склала 19 млн рублёў і кампенсаваная практычна напалову, — удакладніў спікер.
Грэйба расказаў, што сёлета была выкрытая схема «подкупу медыкаў для прасоўвання прадукцыі замежнай фармацэўтычнай кампаніі». Грошы ім перадавалі нібыта за лекцыі, з якімі яны выступалі. Аднак мерапрыемствы па факце не праводзіліся, а грошы медыкам перадавалі за тое, што яны рэкамендавалі пэўныя прэпараты кампаніі.
Зафіксавана больш за 50 выпадкаў перадачы медработнікам незаконных грашовых узнагародаў на агульную суму звыш 400 тысяч рублёў. Распачата сем крымінальных справаў.
— Праверачныя мерапрыемствы па дадзеных фактах намі праводзяцца і далей, — падкрэсліў Грэйба.