Аляксандр Лукашэнка на сустрэчы з сакратарамі саветаў бяспекі дзяржаваў — чальцоў АДКБ выказаўся пра падрыў Кахоўскай ГЭС, перадае яго прэс-служба.
«Вы, напэўна, здагадваецеся, хто падарваў Кахоўскую ГЭС? Кажуць, на злодзеі і шапка гарыць. Хто першы пра гэта закрычаў? Зразумела, што ўкраінскаму боку трэба было схаваць тры дні „контрнаступа“, дзе амаль дзве сотні бронемашын было знішчана і больш за 2 тысячы чалавек загінулі. Таму — Кахоўка, Кахоўка, а пра тое [страты] ніхто не кажа. А гэта ж усё відаць», — заявіў Лукашэнка.
Яшчэ адным аргументам на карысць сваёй тэорыі ён назваў «акуратную, асцярожную пазіцыю ЗША».
«Абавязаныя аддаць ім належнае. Яны адразу сказалі: „Мы пакуль не можам сказаць, хто гэта зрабіў. Мы павінныя разабрацца“. Падумайце, з чаго б гэта?» — задаўся ён пытаннем.
Нагадаем, плаціна Кахоўскай ГЭС была разбураная раніцай 6 чэрвеня. Украіна і Расія абвінавацілі адна адну ў яе падрыве, але існуе дапушчэнне, што яна разбурылася праз атрыманыя раней пашкоджанні.