У Грузіі знайшлі цела беларускі Ірыны Слюсар, якую 22 лютага знесла хваляй у мора. Пра гэта паведамілі ў чаце добраахвотнікі, якія займаліся яе пошукамі.
«Са шкадаваннем паведамляем, што Ірына была знойдзена загінулай. Пошукі завершаныя, аднак мы не можам раскрываць падрабязнасці. Мы глыбока шкадуем пра тое, што адбылося і выказваем спачуванні родным і блізкім. Дзякуй за вашую дапамогу ў пошуках», — такое паведамленне апублікавалі раніцай 27 лютага ў чаце добраахвотнікаў.
У МЗС Беларусі інфармацыю пра гібель Ірыны пацвердзілі.
«У цяперашні час праводзяцца ўсе неабходныя следча-крыміналістычныя мерапрыемствы. Беларускія дыпламаты гатовыя аказаць сваякам загінулай неабходнае консульска-прававое садзейнічанне», — праінфармавалі ў ведамстве.
Нагадаем, увечары 22 лютага Ірына гуляла з сяброўкай і сабакам блізка да краю вады. У нейкі момант хваля накрыла сабаку, і яны палезлі ў мора яе ратаваць. Яе сяброўцы ўдалося выбрацца на бераг, а Ірына знікла.
Ірына Слюсар нарадзілася ў Мінску, скончыла Беларускую дзяржаўную акадэмію мастацтваў і займалася тэатральнай рэжысурай. Яна пераехала ў Грузію ў 2021 годзе.