У Зэльве знік бюст беларускай паэткі Ларысы Геніюш, усталяваны на тэрыторыі мясцовай праваслаўнай царквы, — той самы, які патрабавала знесці праўладная актывістка Вольга Бондарава, але атрымала адмову ад мясцовых уладаў. Пра гэта піша «Радыё Рацыя» са спасылкай на ўнука паэткі Міхася Геніюша. Аднак улады сцвярджаюць, што помнік на месцы.
На фота, якое Міхась Геніюш даслаў у рэдакцыю, бюста ўжо няма на ранейшым месцы на тэрыторыі царквы Святой Тройцы ў Зэльве. Хто яго забраў або аддаў такое распараджэнне — невядома.
У каментары «Радыё Свабода» ўнук паэткі выказаў здагадку, што гэта зрабілі ноччу ў прыватным парадку, а царква да знікнення бюста дачынення не мае.
Геніюш, які цяпер жыве ў Польшчы, дадаў, што не збіраецца заяўляць у беларускую міліцыю пра знікненне помніка сваёй бабулі: кажа, гэтым пытаннем павінныя займацца прадстаўнікі царквы.
«Люстэрка» паспрабавала высветліць, што магло адбыцца з манументам. У Зэльвенскім райвыканкаме ў адказ на званок журналісткі як занепакоенай жыхаркі пасёлка прапанавалі яшчэ раз схадзіць да храма і «дэталёва вывучыць сітуацыю». Там заявілі, што ўказання знесці бюст ніхто не даваў, помнік не дэмантаваны і стаіць на ранейшым месцы, бо належыць Беларускай праваслаўнай царкве.
Нагадаем, напярэдадні стала вядома, што помнік Ларысе Геніюш, які запатрабавала знесці гродзенская праўладная актывістка Вольга Бондарава, не будзе дэмантаваны праз адсутнасць рэгламентавальных нормаў, хоць і быў усталяваны самавольна. Такое рашэнне вынеслі мясцовыя ўлады.
Бондарава дала зразумець, што збіраецца яго абскардзіць. Актывістка сцвярджае, што паэтка ў гады вайны нібыта супрацоўнічала з нацыстамі.
Сам жа бюст быў усталяваны ў 2003 годзе на тэрыторыі зэльвенскай царквы Святой Жываначальнай Тройцы, а яго з’яўленне блаславіў мітрапаліт Філарэт, якога Лукашэнка лічыць сваім духоўным настаўнікам.