Старшыня Камітэта дзяржаўнай бяспекі Іван Церцель, адказваючы на пытанні журналістаў, патлумачыў прычыны ўзмацнення кантролю на знешняй мяжы Беларусі, перадае БЕЛТА. Гэта дадатковыя меры па ўзмацненні контрразведвальнага рэжыму на тэрыторыі Беларусі.
«Гэтая мера рэалізуецца цяпер па ўсім перыметры нашай мяжы. Яна скіраваная на своечасовае выяўленне і лакалізацыю дзейнасці асобаў, якія выношваюць тэрарыстычныя, экстрэмісцкія памкненні ў дачыненні да Беларусі», — заявіў Церцель.
Ён адзначыў, што КДБ вядома «пра наяўнасць рэальных планаў сярод асобаў з баявых груп, сфармаваных на тэрыторыі Украіны, Польшчы, Літвы, Чэхіі, некаторых іншых краін, пра здзяйсненне тэрактаў у Беларусі».
«Вось гэты бар’ер (узмоцнены кантроль на мяжы. — Заўв. рэд.) — гэта толькі адзін са складнікаў, які дазваляе нам ажыццяўляць пэўную фільтрацыю гэтага кантынгенту і не дапускаць на нашую тэрыторыю».
Нагадаем, апошнім часам узмоцненыя праверкі аднавіліся на мяжы Беларусі з Літвой і Польшчай. Сілавікі пачалі выбарачна правяраць мэсэнджары і сацсеткі на тэлефонах. У тых, хто заязджае ў краіну, цікавяцца паездкамі за мяжу за апошнія некалькі гадоў, удзелам у пратэстах у Беларусі і ў мерапрыемствах беларускай дыяспары за мяжой. Таксама задаюць пытанні пра вайну ва Украіне, наяўнасць сваякоў ва УСУ і магчымыя кантакты з замежнымі спецслужбамі.
Адначасова змяніўся фармат праверак беларусаў, якія выязджаюць у ЕС без візаў. Іх выбарачна просяць паказваць віды на жыхарства.
5 траўня Беларусь увяла памежны кантроль на сухапутнай мяжы з Расіяй. Ля тых, хто заязджае ў краіну на аўтамабілях, пачалі правяраць дакументы і багажнікі машын.
