Доктарка зборнай Азербайджана па муай-тай Дыльбяр Сафарава выратавала жыццё беларускай дзяўчынцы на борце самалёта авіякампаніі «Белавія», калі азербайджанская каманда ляцела на гульні краін СНД рэйсам Баку — Мінск, паведамляе выданне haqqin.az.
У самалёце, дзе знаходзілася азербайджанская каманда, двухгадоваму дзіцяці зрабілася кепска. Сафарава аказалася адзіным медработнікам на борце.
«Дзіця білася ў канвульсіях. Я аказала яму першую медыцынскую дапамогу, зрабіла ўкол, каб збіць тэмпературу», — расказала доктарка зборнай Азербайджана.
Стан дзяўчынкі стабілізаваўся, але па рэкамендацыі Дыльбяр Сафаравай самалёт здзейсніў вымушаную пасадку. Яна перадала дзіця дактарам хуткай дапамогі, пасля чаго вярнулася на борт.
Калі ўсё адбылося — не ўдакладняецца, але раней паведамлялася, што самалёт «Белавія» Масква — Мінск экстранна сеў у Віцебску праз недамаганне ў дзіцяці-пасажыра. Гэта здарылася 8 жніўня.
Кіраўнік аэрапорта Віцебск Сяргей Рурыс тады расказаў падрабязнасці інцыдэнту.
— На борце самалёта «Белавія», які ляцеў з Масквы ў Мінск, адбылася экстранная сітуацыя — недамаганне ў дзіцяці. Камандзір паветранага судна выйшаў з намі на сувязь, папрасіў аварыйнай пасадкі. Цягам 15 хвілін мы забяспечылі пасадку, выклікалі медыцынскую дапамогу. Дзіця адразу з самалёта забрала хуткая, — расказваў Сяргей Рурыс.
Пазней у Мінздароўя расказалі, што стан дзіцяці, пра якое самалёт здзейсніў экстранную пасадку ў Віцебску, стабільны.
«Дзіця шпіталізаванае ў Віцебскі абласны дзіцячы клінічны цэнтр праз вострую вірусную інфекцыю з павышэннем тэмпературы», — расказалі ў ведамстве.
Чытайце таксама
