На мінулым тыдні чытач «Люстэрка» напісаў у рэдакцыю пра трагедыю ў мінскай дзіцячай інфекцыйнай клінічнай бальніцы: двое загінулых дзяцей і яшчэ некалькі ў цяжкім стане. Прычына, паводле яго інфармацыі, магла быць у няякасным фізрастворы. Патэлефанавалі з пытаннем пра інцыдэнт на жывую лінію Мінздароўя і расказваем, што ўдалося даведацца.
З пытаннем пра дзіцячыя смерці ў інфекцыйнай бальніцы нашая журналістка як звычайная грамадзянка патэлефанавала на жывую лінію Мінздароўя.
— Кажуць, што ў дзіцячай інфекцыйнай бальніцы было некалькі смерцяў. Ці то праз медычную памылку, ці то праз няякасныя прэпараты. Нідзе інфармацыі пра гэта няма, а ў мяне самой дзіця маленькае. І калі ў нас у бальніцы вось так дзеці паміраюць незразумела чаму, то неяк не вельмі спакойна ад гэтага.
— Медыцынскай памылкі там не было. На цяперашні момант ідзе следства, таму я вам шмат чаго не скажу. Але следства ідзе не з нагоды медыцынскай памылкі, а якраз для таго, каб пацвердзіць, што яе не было. Гэта стандартны класічны момант. І ў страху вочы вялікія. Насамрэч сапраўды адбылася непажаданая рэакцыя на лекавы прэпарат, быў анафілактычны шок. І так здарылася з дзяўчынкай. Але там былі іншыя пытанні, яна не была зусім здаровая. Таму, так скажам, большая частка з таго, што вам сказалі, не зусім праўда. І пытанне там абсалютна не ў медыцынскай памылцы.
— То-бок там не пераблыталі лекі? А як тады ўсё гэта здарылася?
— Там пытанне ідзе пра анафілактычны шок (вострая алергічная рэакцыя, можа прывесці да смерці цягам некалькіх хвілін або гадзін. Можа ўзнікаць у тым ліку пасля ўвядзення лекаў, аднак звестак пра анафілактычны шок, выкліканым каліем, нам знайсці не ўдалося. — Заўв. рэд.). А інфармацыі ў адкрытым доступе вы не знойдзеце, бо пакуль не скончанае цалкам следства, нічога не выдаюць. І ў гэтым выпадку там вельмі шмат чутак, бо вы мне ўжо пра два [выпадкі смерці] расказваеце.
— Ну так, вось мне казалі, што некалькі смерцяў, цяжкі стан, бо нібыта лекі не тыя далі, яшчэ што.
— Скажу вам трошкі звесткі папярэдняга следства: пра тое, што даюць не тыя прэпараты, дакладна не было. Папярэдняя выснова следства гучыць так, што дапамога аказвалася ў поўнай адпаведнасці з патрабаваннямі.
Як расказваў чытач «Люстэрка», прычына смерці і цяжкага стану дзяцей можа быць у павышаным утрыманні калію ў фізрастворы. Такую версію называў адзін з супрацоўнікаў бальніцы: прычынай пагаршэння стану мог стаць калій, які ўвялі дзецям, але рэч была не ў праблеме з якасцю прэпарата. Як расказваў суразмоўца, дзецям паставілі кропельніцы з каліем замест глюкозы, пераблытаўшы ўпакоўкі, якія цяпер пачалі рабіць аднаго колеру. Перадазіроўка калію можа быць смяротнай для чалавека, бо прыводзіць да парушэння сардэчнага рытму.