Балгарыя з 1 красавіка, а Румынія з 31 сакавіка пачнуць выдаваць беларусам шэнгенскія візы, паведамілі амбасады гэтых краін у Мінску.
Амбасада Балгарыі пачне выдаваць беларусам шэнген з 1 красавіка. У дыпмісіі адзначылі, што для «забяспечання больш высокага ўзроўню абслугоўвання заяўнікаў» было заключанае пагадненне з фірмай VFS Global. Візавыя цэнтры гэтага аператара працуюць у дзевяці гарадах: Мінску, Брэсце, Баранавічах, Віцебску, Гомелі, Гродне, Лідзе, Магілёве і Пінску.
У амбасадзе Румыніі паведамілі, што шэнгенскія візы пачнуць выдаваць з 31 сакавіка.
«Візы, выдадзеныя пасля гэтай даты, дазволяць заязджаць у Шэнгенскую зону на тэрмін да 90 дзён цягам любога 180-дзённага перыяду. Аднак, як правіла, заяўнік на візу мусіць будзе звяртацца па візу ў тую дзяржаву, якая з’яўляецца асноўным пунктам прызначэння яго паездкі», — дадалі ў дыппрадстаўніцтве.
У амбасадзе ўдакладнілі, што турысты змогуць скарыстацца выдадзенымі да 31 сакавіка 2024-га візамі цягам усяго тэрміну іх дзеяння толькі для ўезду ў Румынію, а таксама на падставе палажэнняў, выкладзеных у рашэнні ЕС № 565/2014.
«Напрыклад, замежны грамадзянін, які мае візу з двума ці некалькімі ўездамі, выдадзеную Румыніяй да 31 сакавіка 2024 года, зможа падарожнічаць на падставе румынскай візы ў Румынію, Балгарыю і на Кіпр», — праінфармавалі там.