У Мінабароны Расіі прызналі нанясенне удараў па аб’ектах энергасістэмы Украіны, заявіўшы, што ўсе яны дасягнулі мэты. У Генштабе УСУ сцвярджаюць, што расіяне спрабавалі наступаць ў Харкаўскай, Данецкай і Луганскай абласцях, але іх атакі былі адбітыя. У Інстытуце вывучэння вайны мяркуюць, што Пуцін асаблівыя надзеі ўскладае на зіму, спадзеючыся, што холад прымусіць еўрапейцаў стаць больш згаворлівымі і паменшыць ваенную дапамогу Украіне.
Расказваем пра галоўнае са зводак штабоў і ад ваенных экспертаў на 250-ы дзень вайны ва Украіне.
Генштаб УСУ: «Расія рыхтуе для эвакуацыі баржы і пантонныя пераправы»
За мінулыя суткі войскі РФ нанеслі чатыры ракетныя і пяць авіяцыйных удараў, здзейснілі больш за 90 абстрэлаў з рэактыўных сістэм залпавага агню па раёнах больш чым 20 населеных пунктаў. Сярод іх: Купянск Харкаўскай вобласці, Северск Данецкай вобласці, Новая Каменка Херсонскай вобласці і Беразнегаватае і Ачакаў Мікалаеўскай вобласці. Пра гэта Генштаб УСУ паведамляе ў ранішняй зводцы.
— За дзень падраздзяленні Сіл абароны Украіны адбілі атакі расійскіх войскаў у раёнах населеных пунктаў Зялёнае Харкаўскай вобласці, Белагораўка, Мікалаеўка і Навасёлкаўскае на Луганшчыне, Аўдзееўка, Бахмуцкае, Вясёлае, Вадзяное, Маёрск, Мар'інка і Новабахмутаўка Данецкай вобласці.
— Авіяцыя Сіл абароны цягам сутак нанесла па праціўніку 21 удар: 15 — па раёнах канцэнтрацыі ўзбраення і ваеннай тэхнікі, два — па ўзводных апорных пунктах, чатыры — па пазіцыях комплексаў СПА.
— Падраздзяленні супрацьпаветранай абароны УСУ збілі адзін верталёт і адзін штурмавік Су-25 расійскіх войскаў.
— Ракетныя войскі і артылерыя за мінулыя суткі пашкодзілі пункт кіравання і зенітную ракетную ўстаноўку.
— Пацверджанае паражэнне жывой сілы і тэхнікі праціўніка за папярэднія дні: у Херсонскай вобласці знішчаная калона ваеннай тэхнікі праціўніка; у Запарожскай — склад боепрыпасаў, пяць адзінак узбраення і ваеннай тэхнікі рознага тыпу, параненыя да 120 расійскіх вайскоўцаў.
Паводле інфармацыі Генштаба, на акупаванай тэрыторыі Херсонскай вобласці расійскія войскі дэмантуюць і вывозяць абсталяванне вышак сотавай сувязі ў Данецкую вобласць, а таксама працягваюць падрыхтоўку да эвакуацыі асобных падраздзяленняў і ваеннай тэхнікі. Для гэтага ўсталёўваюцца пантонныя пераправы, перыядычна праводзіцца праверка спраўнасці і гатоўнасці баржаў. «Дзве з іх днямі паспяхова знішчаныя падраздзяленнямі Сіл абароны Украіны ў раёне Антонаўскага моста», — заявілі ў Генштабе.
Мінабароны Расіі: «Адбілі атакі УСУ ў Луганскай, Харкаўскай і Херсонскай абласцях»
«Узброенымі сіламі Расійскай Федэрацыі працягнутае нанясенне ўдараў высокадакладнай зброяй вялікай далёкасці паветранага і марскога базавання па сістэмах ваеннага кіравання і энергетыкі Украіны. Мэты удараў дасягнутыя. Усім прызначаным аб’ектам нанесенае паражэнне», — заяўляе расійскае ваеннае ведамства.
— На Купянскім напрамку ў раёнах населеных пунктаў Арлянка Харкаўскай вобласці, Мікалаеўка і Куземаўка Луганскай вобласці знішчаныя больш за 110 украінскіх вайскоўцаў і баевікоў, адзін танк, тры баявыя браніраваныя машыны, два пікапы і два аўтамабілі УСУ.
— На Чырвона-Ліманскім напрамку адбітыя атакі трох ротных тактычных груп УСУ ў кірунку населеных пунктаў Макееўка і Чырвонапапоўка Луганскай вобласці: знішчаныя больш за 170 ўкраінскіх вайскоўцаў, тры танкі, пяць баявых браніраваных машын і дзевяць аўтамабіляў.
— На Данецкім напрамку штурмавымі падраздзяленнямі расійскіх войскаў і агнём артылерыі за суткі знішчаныя больш за 60 украінскіх вайскоўцаў, танк, дзве баявыя браніраваныя машыны і два аўтамабілі.
— На Мікалаеўска-Крыварожскім напрамку адбітыя чатыры атакі УСУ ў напрамку населеных пунктаў Пяціхаткі, Чырвоны Яр, Ішчанка і Зялёны Гай Херсонскай вобласці. Знішчана звыш 70 украінскіх вайскоўцаў і наймітаў, пяць баявых браніраваных машын, сем аўтамабіляў і адна германская самаходная артылерыйская ўстаноўка Panzerhaubitze-2000.
Усяго за суткі, паводле дадзеных МА РФ, пашкоджаныя восем пунктаў кіравання, 57 артылерыйскіх падраздзяленняў, жывая сіла і ваенная тэхніка ў 136 раёнах.
Знішчаныя чатыры склады боепрыпасаў, збітыя 13 беспілотнікаў, перахопленыя ў паветры чатыры снарады рэактыўных сістэм залпавага агню HIMARS і «Вольха», а таксама сем супрацьрадыёлакацыйных ракет HARM.
Інстытут па вывучэнні вайны: «Пуцін спадзяецца на зіму, мабілізацыю і прызыўнікоў»
Прэзідэнт Расіі Уладзімір Пуцін працягне праводзіць звычайныя ваенныя аперацыі ва Украіне, каб утрымаць акупаваныя ў цяперашні час тэрыторыі і заваяваць новыя, лічаць у Інстытуце па вывучэнні вайны (ISW). Там адзначаюць, што Пуцін наўрад ці пойдзе на эскалацыю прымянення тактычнай ядзернай зброі, аднак, хутчэй за ўсё, працягне шантажаваць гэтым у надзеі зламаць волю Захаду працягваць падтрымліваць Украіну. Таксама Пуцін спадзяецца, што зімой дэфіцыт паліва прымусіць некаторыя еўрапейскія краіны скараціць дапамогу Украіне і пачаць адносіны з Расіяй.
На думку аналітыкаў, на карысць такога сцэнару развіцця падзей паказвае, у прыватнасці, праведзеная Пуціным «частковая мабілізацыя».
«Ён заплаціў за гэтую мабілізацыю вельмі высокую ўнутрыпалітычную цану ў выглядзе ўцёкаў сотняў тысяч расіян у іншыя краіны, беспрэцэдэнтных пратэстаў і такой жа беспрэцэдэнтнай крытыкі дзеянняў расійскіх вайскоўцаў і расійскіх уладаў. Плаціць гэтую цану мела сэнс, калі Пуцін мае намер працягваць вайну і разумее, што ва Украіну трэба неадкладна адправіць падмацаванне, каб утрымаць пазіцыі да таго, як падаспее новы прызыў і разверне сітуацыю на яго карысць», — упэўненыя ў ISW.
Аналітыкі адзначаюць, што расійскае заканадаўства не перашкаджае выкарыстанню прызыўнікоў на тэрыторыі Расіі, незалежна ад таго, якую яны прайшлі падрыхтоўку, нагадваючы пра абвешчаныя расійскай тэрыторыяй аннексаваныя вобласці Украіны.
«Такім чынам, спалучэнне толькі што завершанай частковай мабілізацыі рэзерву і гадавога цыклу прызыву стварае дзве імаверныя хвалі прытоку расійскіх войскаў ва Украіну: адна — цягам наступных некалькіх тыдняў, а другая — вясной 2023 года».
Што да надзеі Пуціна зламаць волю Еўропы шляхам спынення паставак энерганосьбітаў з Расіі на зіму, то, як адзначаюць у Інстытуце, еўрапейскія лідары гатовыя да ціску, з якім яны могуць сутыкнуцца ў пачатку халоднага сезона. Ці змогуць яны яго вытрымаць і ці спраўдзіцца разлік Пуціна — пакажа толькі час.
Яшчэ з ключавых высноваў экспертаў:
- паводле непацверджаных паведамленняў расійскіх крыніц, генерал-лейтэнант Андрэй Мардвічоў (камандуючы 8-й агульнаваеннай арміяй Паўднёвай ваеннай акругі) змяніў генерал-палкоўніка Аляксандра Лапіна на пасадзе камандуючага Цэнтральнай ваеннай акругай (ЦВА) з 30 кастрычніка;
- Міністэрства абароны РФ і расійскія крыніцы сцвярджалі, што расійскія войскі адбілі атакі на ўкраінскія Першамайскае, Табаеўку і Берастова ў Харкаўскай вобласці;
- расійскія войскі працягвалі абстрэльваць украінскія пазіцыі ў Берыслаўскім раёне Херсонскай вобласці;
- расійскія крыніцы сцвярджаюць, што 30 кастрычніка расійскія войскі захапілі Вадзяное і Паўлаўку ў Данецкай вобласці.