У Мінабароны Расіі заявілі, што «добраахвотнікі штурмавых атрадаў» захапілі ў Данецкай вобласці вёску Благадатнае. У Генштабе УСУ гэтую інфармацыю ніяк не пракаментавалі. У зводцы толькі паведамілі, што праціўнік, несучы вялікія страты, працягвае наступаць на Ліманскім і Бахмуцкім напрамках. У Інстытуце па вывучэнні вайны адзначаюць, што пацвярджаюцца здагадкі пра тое, што Расія рыхтуе буйны наступ у Луганскай вобласці.
Расказваем пра галоўнае са зводак штабоў і высноваў экспертаў на 342-і дзень вайны ва Украіне.
Генштаб УСУ: адбілі атакі ў раёнах 13 населеных пунктаў
Расійскія войскі працягваюць знішчаць крытычную інфраструктуру Украіны, наносіць ракетныя ўдары, абстрэльваць з артылерыі цывільныя аб’екты і жылыя дамы, адзначае Генштаб УСУ ў ранішняй зводцы.
— За мінулыя суткі праціўнік нанёс тры авіяцыйныя і чатыры ракетныя ўдары, правёў больш за 60 абстрэлаў з рэактыўных сістэм залпавага агню. Ёсць пацярпелыя сярод мірных жыхароў.
— На Валынскім, Палескім, Северскім і Слабажанскім напрамках пад абстрэл трапілі 24 населеныя пункты; на Купянскім напрамку ад варожага агню пацярпелі сем населеных пунктаў; на Ліманскім напрамку абстраляныя дзевяць населеных пунктаў; на Бахмуцкім — 13; на Аўдзееўскім напрамку пад танкавы, мінамётны і артылерыйскі агонь трапілі восем населеных пунктаў; на Навапаўлаўскім — абстраляныя шэсць населеных пунктаў; на Запарожскім напрамку пацярпела больш за 20 населеных пунктаў; на Херсонскім напрамку пад абстрэлы з рэактыўных сістэм залпавага агню, ствольнай артылерыі і мінамётаў трапілі раёны сямі населеных пунктаў.
— Праціўнік, несучы вялікія страты, працягвае наступаць на Ліманскім і Бахмуцкім напрамках, вядзе беспаспяховыя наступальныя дзеянні на Аўдзееўскім і Навапаўлаўскім напрамках, на Купянскім і Запарожскім — абараняе раней захопленыя рубяжы.
— За мінулыя суткі падраздзяленні Сіл абароны Украіны адбілі расійскія атакі ў раёнах населеных пунктаў Навасёлаўскае, Белагораўка Луганскай вобласці і Ямполаўка, Спірнае, Чырвоная Гара, Параскавіеўка, Бахмут, Кляшчэеўка, Іванаўскае, Аўдзееўка, Вадзяное, Першамайскае і Вуглядар у Данецкай вобласці.
Авіяцыя Сіл абароны Украіны за суткі нанесла чатыры ўдары па раёнах канцэнтрацыі праціўніка.
— Падраздзяленні ракетных войскаў і артылерыі пабілі тры пункты кіравання, чатыры раёны канцэнтрацыі і два склады боепрыпасаў расійскіх войскаў.
У Генштабе заяўляюць, што расійскія войскі нясуць вялікія страты і пачалі размяшчаць параненых у цывільных медыцынскіх установах. «У горадзе Луганск, на тэрыторыі радзільні гарадской бальніцы № 3 і абласной радзільні бальніцы, акупанты разгарнулі „палявы шпіталь“, дзе лечаць расійскіх вайскоўцаў. У сувязі з выкарыстаннем праціўнікам дзвюх радзільняў для лячэння параненых расіян у горадзе можна прыняць роды толькі ў Луганскім абласным перынатальным цэнтры, дзе катастрафічна не хапае месцаў і ствараюцца рызыкі і неспрыяльныя ўмовы для родаў», — расказалі ва ўкраінскім Генштабе.
Мінабароны РФ: збілі верталёт і пяць беспілотнікаў
У Міністэрстве абароны Расіі заявілі, што працягваюць наносіць агнявыя ўдары па падраздзяленнях УСУ.
— На Купянскім напрамку артылерыя «Заходняй» групоўкі войскаў нанесла агнявое паражэнне жывой сіле і тэхніцы падраздзяленняў 114-й і 103-й брыгадаў тэрытарыяльнай абароны ў раёнах населеных пунктаў Масютаўка і Табаеўка Харкаўскай вобласці. Страты УСУ за суткі на гэтым напрамку склалі да 45 вайскоўцаў, адзін танк, чатыры баявыя браніраваныя машыны, аўтамабіль, а таксама гаўбіца Д-20.
-На Чырвона-Ліманскім напрамку агнём артылерыі і цяжкіх агнямётных сістэм групоўкі войскаў «Цэнтр» нанесенае паражэнне падраздзяленням 25-й паветрана-дэсантнай і 95-й дэсантна-штурмавой брыгадаў УСУ ў раёне населенага пункта Ямполаўка Данецкай вобласці, а таксама Серабранскага лясніцтва. Знішчаныя больш за 60 вайскоўцаў і чатыры баявыя браніраваныя машыны УСУ.
— На Данецкім напрамку ў выніку паспяховых наступальных дзеянняў добраахвотнікі штурмавых атрадаў пры агнявой падтрымцы аператыўна-тактычнай і армейскай авіяцыі, ракетных войскаў і артылерыі «Паўднёвай» групоўкі войскаў захапілі населены пункт Благадатнае Данецкай вобласці. За суткі на гэтым напрамку знішчаныя: да 50 вайскоўцаў, самаходная артылерыйская ўстаноўка Caesar, артылерыйская сістэма М-777, а таксама гаўбіца МСТА-Б.
— На Паўднёва-Данецкім напрамку падраздзяленні групоўкі войскаў «Усход» нанеслі агнявое паражэнне падраздзяленням 72-й механізаванай брыгады УСУ ў раёне населенага пункта Вуглядар, а таксама 110-й брыгады тэрытарыяльнай абароны ў раёне населенага пункта Наваполь Данецкай вобласці. Страты УСУ на гэтым напрамку за суткі склалі звыш 40 вайскоўцаў, адзін танк, дзве баявыя браніраваныя машыны і два пікапы. Акрамя таго, у раёнах населеных пунктаў Вуглядар і Кацярынаўка знішчаныя два склады з артылерыйскімі боепрыпасамі УСУ.
— На Херсонскім напрамку ў рамках контрбатарэйнай барацьбы знішчаныя дзве самаходныя артылерыйскія ўстаноўкі «Гваздзік», а таксама два склады з боепрыпасамі УСУ ў раёнах населеных пунктаў Міхайлаўка і Зміеўка Херсонскай вобласці.
Усяго за суткі, паводле МА РФ, нанесенае паражэнне 84 артылерыйскім падраздзяленням, жывой сіле і ваеннай тэхніцы УСУ ў 126 раёнах. Збіты верталёт Мі-8 Паветраных сіл Украіны, знішчаныя пяць беспілотных лётных апаратаў. Перахопленыя тры рэактыўныя снарады сістэмы залпавага агню HIMARS.
Інстытут па вывучэнні вайны: Расія і Іран ствараюць аналаг SWIFT
Пацвярджаецца ацэнка ISW наконт таго, што Расія рыхтуецца да «непазбежнага наступу» ў найбліжэйшыя месяцы. На гэта звяртаюць увагу заходнія, украінскія і расійскія крыніцы, гаворыцца ў свежай справаздачы амерыканскага Інстытута па вывучэнні вайны.
Эксперты лічаць, што наступ, імаверна, пачнецца ў Луганскай вобласці. Яны таксама адзначаюць, што расійскія ваенныя блогеры рыхтуюць інфармацыйную прастору да гэтага наступу, заяўляючы, што асноўныя расійскія сілы яшчэ «не ўступілі ў бой».
Расія і Іран працягваюць паглыбляць эканамічнае супрацоўніцтва. Дзяржаўныя СМІ Ірана паведамілі, што 29 студзеня Іран і Расія наладзілі непасрэдныя каналы фінансавай сувязі паміж іранскімі і больш чым 800 расійскімі банкамі, падпісаўшы мемарандум аб узаемаразуменні. У ISW адзначаюць, што іранскія афіцыйныя асобы прадставілі гэты дакумент як сродак абысці заходнія санкцыі, уведзеныя ў дачыненні да Ірана і Расіі. Яны таксама ствараюць уласную аплатную сістэму, аналагічную SWIFT.
На што яшчэ звярнулі ўвагу эксперты:
- расійскія войскі працягвалі наземныя атакі, каб вярнуць страчаныя пазіцыі на захад ад Крамянной, а ўкраінскія войскі вялі контрнаступальныя аперацыі на паўночны захад ад Сватава;
- украінскія сілы працягвалі наносіць удары па канцэнтрацыі расійскіх войскаў у тылавых раёнах Луганскай вобласці;
- расійскія войскі працягвалі наносіць удары па лініі фронту ў Данецкай вобласці;
- расійскія войскі працягвалі заваёўваць тэрыторыю каля Бахмута;
- пацверджаных наземных атак расійскіх войскаў у Запарожскай вобласці не праводзілася;
- Міністэрства абароны Расіі працягнула рабіць захады па павышэнні прафесіяналізму расійскіх узброеных сіл і працягвае сутыкацца з негатыўнай рэакцыяй на гэтыя захады;
- расійскія сілы і акупацыйныя ўлады працягваюць пераслед крымскіх татараў, спрабуючы звязаць антырасійскія настроі з экстрэмісцкай ці тэрарыстычнай дзейнасцю.
