У Фінляндыі падвялі вынікі другога туру прэзідэнцкіх выбараў. Лідарам краіны стаў экс-прэм'ер Аляксандр Стуб, які перамог былога кіраўніка МЗС Пека Хаавіста, піша фінскае выданне Yle.
Экс-прэм'ер-міністр Аляксандр Стуб быў кандыдатам ад правацэнтрысцкай Нацыянальнай кааліцыйнай партыі. Былы міністр замежных справаў Пека Хаавіста, сябра левацэнтрысцкай партыі «Зялёны саюз», балатаваўся ў якасці незалежнага кандыдата.
Цяперашняга прэзідэнта Саўлі Ніінісцё не было сярод кандыдатаў, бо ён узначальвае краіну ўжо два тэрміны з 2012 года і не мог больш балатавацца ў прэзідэнты.
Аляксандр Стуб нарадзіўся ў 1968 годзе ў Хельсінкі. Быў міністрам замежных справаў (2008−2011), міністрам па справах ЕС і знешняга гандлю (2011−2014), прэм’ер-міністрам (2014−2015) і міністрам фінансаў Фінляндыі (2015−2016).
Падчас перадвыбарнай кампаніі ўсе кандыдаты на найвышэйшую дзяржаўную пасаду абяцалі ў выпадку перамогі заняць жорсткую пазіцыю ў дачыненні да суседняй Расіі. Прэзідэнт у Фінляндыі кіруе знешняй палітыкай і палітыкай бяспекі ў цесным супрацоўніцтве з урадам, прадстаўляе краіну на сустрэчах NATO і з’яўляецца галоўнакамандуючым сіламі абароны.